絲絲講場：港交所亂闖 張華峰郁手

用腳投票 大手減持

咁多年「感情」，點解話「變心就變心」呢？張華峰話，眼見港交所近期嘅連串動作，從一個股東立場同期望嚟睇，係有所偏差。係人都知依家環球經濟動盪，金融市場經營困難，但偏偏港交所喺呢個時候卻大灑金錢，大肆投資，除咗斥資近30億元革新技術外，好似興建數據中心、大搞設備託管服務等，仲話要收購倫敦金屬交易所（LME）添！

對張華峰嚟講，呢連串舉動都係風險大過利益同回報。一向喺「金魚缸」見慣風浪嘅佢，都要面對現實，以腳投票，沽咗部分港交所股票。

帶團訪京 回饋城大

最近盛傳「阿爺」喺「七‧一」會「送大禮」，佢就話暫時未有聽聞，但月中佢就會去北京，屆時見吓啲老朋友，到時順便「收收風」咁。佢今個月二十四日會率領香港城市大學學生會出訪北京，訪問有關部門，主題係了解國家喺「十二‧五」嘅規劃。點解佢會同城大拉上關係？原來佢多年前喺城大讀MBA，佢今次會以團長身份，率領一行四十人，包括校長在內，到訪北京。

余詩韻