絲絲講場：希慎新舵手講明唔炒股

劉少全之前曾經喺投行做過分析員，同啱啱接任執行主席嘅利希慎孫女利蘊蓮，都係來自投資金融界。有小股東就擔心希慎會不務正業，不過劉少全相信佢會將研究分析經驗，應用喺集團業務發展，公司亦唔會再「炒股票」或者投資其他非核心嘅業務，自九九年之後，都無再進行新嘅證券投資喇！

大Project希慎廣場八月開幕後，嚟緊會有咩大計？劉少全貫徹投行作風，做咗拉鏈口，話暫時無咩可以講，只係話喺發展希慎廣場嘅時候，累積咗唔少人才、技術、經驗，相信都可以為未來發展提供資源。

預告派息唔疏爽

利蘊蓮話，依家零售樓面已租出約95%，平均呎租150元，至於寫字樓樓面就只有40%，不過佢話一啲都唔心急！有股東就話，公司嘅商場的確好高級，但派息政策就一啲都唔高級，管理層解釋，近年起希慎廣場用咗唔少錢，影響到派息，仲講到明今年資金需求仍然好高，畀晒心理準備大家。