早前盛傳會接替張智媛出任會計師公會行政總裁嘅丁偉銓，尋日終於獲會計師公會正式委任，將於七月一日履新，接替喺六月三十日last day嘅張智媛。
會計界對丁偉銓即將出任會計師公會CEO，反應都唔錯。丁偉銓原本係國浩（00053）執行董事，公司日前已宣布佢將會喺六月起辭任。至於南順 （00411）日前亦宣布，佢將會由執行董事調任為非執行董事。
今年51歲嘅丁偉銓，喺會計師界已有超過27年經驗，其中逾七年係喺會計師公會擔任專業操守總監，佢亦都係現任會計師公會理事。會計師公會會長包凱就話，CEO甄選過程係由五位成員組成嘅遴選委員會負責，過程嚴謹，並且大讚丁偉銓對會計師公會多元化而且複雜嘅運作有相當了解。