絲絲講場：玫瑰贈Rose 恒生11支顯心思
恒生銀行（00011）新任副董事長兼行政總裁李慧敏（Rose）尋日履新，一班高層搞咗個簡單而有意義嘅歡迎儀式，呢個儀式都好有「諗頭」，係有雙重意義嘅。
加埋李慧敏 剛好一打
係女人都鍾意收花o架啦，一班高層就揀咗送粉紅色玫瑰，最煞食係送十一支，皆因恒生銀行嘅股票代號係11，而且加埋真正嘅Rose Lee，啱啱好砌夠一打，好完整。
恒生同事 拍檔兼好友
佢一返工就同高層開會，仲計劃上任後到分行了解前線運作，同員工交流。佢尋日仲晨咁早，就透過早晨廣播，同員工「報到」兼say hello。
Rose雖然初嚟報到，實情佢已經喺滙豐集團做咗30幾年。佢喺廣播中話，自從八十年代開始，同好多恒生嘅同事合作過，好似何德徵、歐肇基、林太Mrs Alice Lam啦、吳源田阿田哥啦，唔單止係工作上好拍檔，亦都係好朋友。
Rose話返工之前，翻閱咗恒生嘅歷史資料，佢對恒生嘅創辦人同埋前輩非常敬重，佢哋有好遠大眼光同埋智慧，喺好早就為恒生建立良好嘅企業文化。呢啲咁有傳統智慧嘅信念，好值得珍惜。
余絲韻