Market Insight：前景不明 危機四伏

港股咁弱，令人懷疑同「天使」走資有關係，自從上周五收市後金沙（01928）染藍之後，連續兩日港股跌幅都較為誇張。伊斯蘭基金、教會基金及教育基金等均不能沾手賭股，所以要沽走盈富（02800）。呢類基金「晒士」絕對唔細，港股亦雪上加霜。

日韓股市微升，港股雖然唔算斯人獨憔悴，但論樣衰程度肯定稱第二（第一係希臘），尤其減存備率（RRR）之後，港股只係升得半日，一點半之後直踩到收市，恒指全日再跌229點，期指繼續低水，國指更跌穿1萬點，44隻恒指牛證打靶，恒指已踩落牛證重災區，按照往績，將班牛仔殺得八八九九嘅時候，個市就可見底回升，但今次的確非比尋常，標普最近一份報告就用「完美風暴」來形容危機，所以咪咁心急撈貨。

放大圖片

放大圖片

希臘脫歐演大龍鳳

希臘到禮拜四就知能否成功組閣，但已打定輸數，市場現在正盤算希臘一旦退出歐元區會有乜嘢後果。記得三月進行歐債談判時，有機構唔知點計得出希債若全面違約，可能對歐元體制構成1萬億歐元之經濟損失，嚇到班債主即時妥協。查實筆數好難計，因為會有連鎖骨牌效應，左翼已逐步坐大，德國總理默克爾所屬基督民主聯盟已在最大州份議會選舉失利，明年初德國大選或是「完美風暴」最後一章。

A股同港股一樣先升後跌，就算減RRR，內銀A、H股一樣要跌，但內房股仍有小半可以微升。減RRR表面有利內銀，不過內銀現時面對嘅係貸款需求不足問題，之前已兩次減咗RRR，但今年首四個月淨得三月份新增貸款有增加，可見現在並非冇錢借，而係冇人借，提供另類貸款之中國信貸（08207）今年首季亦僅多賺一成。

內需谷唔起有原因

內地發布首份《中國家庭金融調查報告》，有好多內容係出人意表，原來大陸有接近九成家庭有樓自住，遠高於世界平均之六成水平，所謂買樓剛性需求其實唔係咁大；而收入最高一成家庭，其儲蓄率達六成，其儲蓄佔總儲蓄之75%，反映民眾唔係唔想消費，而係冇錢消費，谷唔起內需查實有因。

報告關於炒股方面極為詳盡，得22.2%家庭賺錢，打和佔21.8%，蝕錢則達56%。而賺蝕同年齡成正比，顯示「經驗」係其中一樣本錢；不過同學歷則冇關係，反而學歷愈低愈賺錢，雖然好似唔合理，但以前有個研究話經濟學家選股仲差過隨機掟飛鏢，皆因船頭驚鬼、船尾驚賊，白白錯失投資良機。

港股8連跌，廣藥（00874）就幾乎11連升（中間有一日下跌），花旗睇14蚊，但實際都要睇注資條款，而且注資相信要等一段時日。但隻中糧包裝（00906）尋日就大跌8.7%，因紅罐王老吉佔公司近半收入，依家王老吉易主，廣藥會唔會再用番中糧包裝幫佢造罐屬未知之數。

輕傷至重傷股不計其數，龍源電力（00916）計劃批股即跌一成，通常公司批股先係炒高再靜雞雞搵人配售，但H股就手續多多，未批得成，股價已唔見一截。雷士照明（02222）亦加入民企插水行列，公司話晒係全國有名氣燈膽商，大股東之前見密密增持，唔通個市真係要錢唔要貨？

國策撐住醫藥板塊

論板塊，唔知係唔係早前發改委話支持醫藥業購併重組，加埋近期廣藥強勢所帶動，有唔少醫藥股逆市上升，就如上海醫藥（02607）升1%、利君國際（02005）升2.9%、中國製藥（01093）升2.5%、同仁堂科技（01666）升3.9%。

事實上，今年三月官方已下發「十二五」期間深化醫藥衞生體制改革規劃暨實施方案，以實現到二○二○年人人享有基本醫療衞生服務的既定目標，預計未來五年，投入醫藥行業的資金只會有增無減，且各種改革將推動行業提升效益，以滿足工業化、城鎮化和人口老化對醫療衞生服務的需求。板塊有國策支持，企業盈利可測性較高。

換上另一角度，市況疲弱，仍停留在魚缸的游資，會游走於個別強勢板塊避險，呢期醫藥股好明顯有資金流入，短線表現可繼續跑贏大市。

古勝