喺絲絲嘅記憶之中，百勝集團（YUM!）好積極發展，舊年收購小肥羊後將佢私有化，YUM!仲同中石化（00386）合作開餐廳，而最新嘅搞作就係同內地電器連鎖經營商蘇寧電器聯手開餐廳，目標喺五年開夠一百五十間！
喺舊年年底，絲絲聽過有老友開出盤口，估吓喺油站食到麥記（McDonalds）定雞記（KFC）先，點知轉頭百勝已經宣布，將會喺中石化全國嘅加油站、高速公路服務區同其他中石化擁有嘅物業，開肯德基之餘，仲賣埋pizza（必勝客）。
今次嘅重頭戲係同大型電器零售商合作，基本上係將同中石化嘅合作模式「照辦煮碗」。蘇寧喺內地超過六百個城市都有分店，網絡夠晒廣，傳聞話今次嘅合作，雖然唔屬於獨家協議，但蘇寧會喺日後旗下物業開餐廳時，以百勝為首選。聽講話四月已經開咗十七間，分布喺南京、北京、上海、昆明、大連等地。絲絲覺得最吸引嘅，就係今次仲會開埋啱啱收購番嚟嘅中式火鍋小肥羊，真係啱晒絲絲口味！