絲絲講場：新世界 母親節有禮
近期幾個發展商都有新盤出，好似新世界發展（00017）咁，重點新盤沙田車公廟站嘅溱岸8號，好快就推出，執行董事兼聯席總經理陳觀展正忙於應戰。
陳觀展獻花 只限女性
絲絲尋日喺新世界總部搵朋友，見到佢竟然喺一班女人堆入面嘻嘻哈哈，大家唔好誤會，佢只不過係代表公司，提早同班同事慶祝母親節啫。
陳觀展親自走到同事嘅工作間，為同事獻上康乃馨及心意卡，無論係咪做咗人哋阿媽，收到呢啲禮物，都好窩心o架。陳生話，咁樣做唔單只係向已為人母嘅同事致敬，感謝佢哋多年嚟為公司同為家庭嘅付出，同時亦鼓勵作為子女嘅同事向母親聊表心意，促進同事家庭和諧及融洽。
生日有利是 兼多日假
企業傳訊總經理張一心同絲絲講，唔單只母親節有花收，婦女節會有紅棗茶、中秋節有月餅、生日有利是兼一天生日假期、準爸爸有侍產假，今年初仲成立咗新世界體育會，咁多窩心嘅德政，唔怪之得佢哋做得咁開心啦！