兩個月前喺人民銀行貨幣政策委員會退咗落嚟嘅李稻葵，經過一輪沉澱之後，喺英國《金融時報》寫咗篇文章，同大家分享佢做央行專家委員嘅心得。喺兩年嘅央行生涯入面，佢話自己得到三個教訓，包括「尊重投資者嘅情緒」，即係唔好同市場抗衡喇！
李稻葵話佢接到邀請做貨幣政策委員嗰陣，雖然已有近20年嘅教學經驗，但仲覺得自己未準備好。尤其係當時已經爆發咗金融海嘯，暴露出傳統宏觀經濟理論中嘅缺陷，所以任務好艱巨。
首先，係人都知人行係國務院控制嘅，而貨幣政策委員會更加由唔同機構嘅官員組成，所以有關「中央銀行獨立性」嘅講法，佢話只係「無益嘅迷信」。理論上講，只係當政客面臨改選壓力嗰時，以「獨立」作為最好嘅免責辯護啫。
第二個教訓係「唔好對價格手段嘅力量過於自信」。教科書話價格係市場經濟中最基本嘅訊號，但現實中，價格訊號根本就唔夠快，所以對利率同匯率政策嘅期望，都係謙虛啲好。
至於第三個教訓，就係要尊重投資者嘅情緒。金融海嘯之前，人行喺貨幣政策對投資嘅影響力仲有成七成咁多，係因為有壓倒性嘅優勢，依家最多只得五成。雖然李稻葵已經返去清華大學教書，但佢仍然對人行嘅動作好關注，仲話中國需要改革，必須強化各個大小證券市場，仲應該推行銀行貸款證券化。
余絲韻