Market Insight：雨潤食品估值仍偏低

期指已跌穿兩萬點，計埋除息因素，實際亦低水過百點，恒指上月低位危危乎，主要係外圍搖搖欲墜，中國進出口疲弱，美國就業市場放緩，西班牙債息又重上6厘危險界線，中投亦表示唔會再買歐債，唯一正面消息係希臘激進左翼聯盟籌組聯合政府失敗，歐盟亦如期發放緊急援助，但唔算係乜嘢好消息，因為下月難以避免要再舉行國會選舉。

之前嘅中國PMI數據曾經令市場有過高期望，點知中國四月出口急降4個百分點至4.9%，進口更升得0.3%，同市場預期嘅雙位數差好遠；美銀解釋係舊年同期日本地震令外貿大增，但無論係點，呢個數據令市場大感意外，重燃對航運股同內需嘅憂慮。不過，外圍股市反應又唔算大，滬綜指仍然微升，美期以至歐股直至四點前亦上升，但港股只係自己體質虛弱。

放大圖片

放大圖片

通脹壓力漸紓緩

中移（00941）一度逼近90蚊大關，聯通（00762）傳3G再度劈價亦冇影響，前日創新低嘅中電信（00728）同告反彈。除咗中移金槍不倒之外，昨能逆市上升股多數只係超賣下技術反彈，例如前日大跌之六福（00590）、東表（00398）及I.T（00999）等零售股。昨創52周新低股份亦唔少，假若跌穿兩萬點，隨時衰過舊年十月時。

今日輪到公布CPI，數據重要性已大為降低，人行尋日逆回購240億人仔，短期降存備率機會亦唔大。

必需品股夠堅挺

國際油價同成品油價雙降有利通脹進一步回落，但生豬價格連跌12個禮拜後首次止跌回升，好多產品已準備加價，發改委頻頻要「約談」加價企業，如食用油及尿素企業，希望高抬貴手暫時唔好加價。不過，就算產品價格上升，股價卻反方向下跌，尿素價格今年上漲幅度達17%，但你睇中海石化（03983）股價！

假設經濟環境真係差到無倫，大眾智慧都知係買必需品股，「廁紙雙雄」係最佳例子，尋日升跌板塊亦反映經濟前景，航空股同航運股表現最差，但恒安（01044）及華創（00291）則逆市上升。除咗廁紙之外，食品毫無疑問亦係必需品，不過今日所講並非「台資三寶」，旺旺（00151）同統一（00220）的確係近期奇葩，但估值亦係非比尋常。

台資威到盡，中資反而不濟，一驚食品安全，二驚民企帳目。股價較好樣嘅僅得已收編「國家隊」之蒙牛（02319），而雨潤食品（01068）同神冠（00829）投資者寧願避之則吉，雨潤已見舊年連環事故以來新低，但人棄卻見大行執平貨，瑞信同大摩分別增持490萬股同545萬股，豬價回升亦可改善毛利率，管理層在前日股東會上表示今年業績應勝過舊年，計落PE只係單位數字。

神冠價低則有大股東自行增持，公司喺人造腸衣市場已接近壟斷地位，睇落冇乜增長空間，查實目前內地香腸大部分仍用天然腸衣，但天然腸衣反而會產生食品污染安全風險，所以人造腸衣市佔率正日漸上升，神冠4蚊邊買其實幾穩陣。

入市意欲極低迷

國際油價下滑，內地成品油價一如預期下調，「三桶油」股價齊挫，中石油（00857）、中海油（00883）同中石化（00386）跌幅介乎0.9至2%。古勝前日話，中石化早在發改委下調成品油價格前已率先動手降價促銷，股價繼續尋底在所難免。另一方面，成品油價下調，應利好航空、物流及化工等企業，但見昨日三隻中資航空股全線低收，儀征化纖（01033）亦跌1.7%收市。

顯然，如今投資者嘅入市意欲極之低迷，利好消息起唔到多大刺激作用，利淡消息就放大幾倍反映在股價上。看來今年五月「Sell in May」真是投資嘅金句！

古勝