內地又有新嘅富豪放榜，呢份由民生銀行同《新財富》雜誌一齊發布嘅「新財富500富人榜」，萬達集團老闆王健林以460億元嘅身家榮登榜首，喺香港比較知名、舊年被胡潤評為中國首富嘅三一重工董事長梁穩根，都要以440億元屈居第二，但三一重工今年有八個人上榜，已經威盡全國喇。
三一重工今次有八個人同時上榜，打破咗舊年由佢保持嘅同一公司上榜人數最多嘅六人紀錄。三一重工副總裁袁金華唔止自己上榜，前妻王海燕都因離婚分到市值24億元嘅股份，成為今年新上榜嘅三個女富豪之一。睇返尋日呢份富豪榜，房地產業仲係富豪身家最高嘅行業，有成70個人上榜。地產首富同墊底嘅交通運輸業首富，身家差距有成7.7倍咁多，今年交通運輸業首富係河北遠洋運輸嘅高彥明，身家有60億元，睇落真係同王健林有啲距離。
余詩韻