中證監兩個禮拜前宣布，內地四間期貨交易所由六月起全部降低手續費。呢項決定梗係「德政」喇，即刻幫政府避免咗「央企謀取暴利」嘅負面情緒全面擴大。
好似上海期貨交易所咁，去年納咗20幾億人仔嘅稅，躋身上海十大稅戶，仲勁過上海證券交易所，再唔減費，肯定畀人炮轟o架。
上海期貨交易所係由「國務院期貨監督管理機構審批」設立嘅，唔係以賺錢為目的，○三年由會員出資認繳註冊資本1.25億人仔成立，去年純利已經接近60億人仔。根據交易所章程規定，稅後淨利會轉做盈餘公積金。不過，佢地從來冇分過一個仙畀會員，估計佢地咁多年累積嘅盈餘公積金已經過百億人仔。
歷經咗廿年風風雨雨嘅160幾家期貨公司，大部分都只係處「溫飽」狀態。去年佢哋加埋嘅純利只得23億人仔，如果唔係其中三間商品期交所將去年第四季嘅手續費畀番期貨商，有啲公司可能執笠喇。睇嚟期交所一日唔行真正嘅會員制，就好難撇除攫取暴利嘅形象嘞。