雨潤（01068）尋日開股東大會，絲絲就八卦去（目及）吓，點知一去到就見到公司董事長兼執行董事祝義材，佢來匆匆去也匆匆，但就畀絲絲（目及）到佢隻左眼腫咗！公關姐姐叫絲絲唔好諗多咗，佢只不過係自己早幾日整親，但腫住咁嚟開股東會，認真唔話得。
絲絲仲聽聞話佢近日周圍飛，又不時會見投資者，尋日都係即日來回咋，連見吓記者朋友嘅時間都無。尋日在場有個自稱嚟自深圳嘅小股東好勞氣，呢位林生發嬲並唔係因為雨潤股價插水，佢反而話對股價唔係太在乎，對行業好有信心，咁絲絲就真係唔明。
原來呢個股東聲稱自己持有幾百萬股雨潤，但尋日竟然無得參與股東會，聽講話係因為佢無證券登記資料，但佢就堅持自己係股東，佢仲話好唔滿意管理層，話佢地無信譽、消息公布唔清晰，應該換人！
絲絲聽到祝總喺會上話對公司有信心，又話會改善毛利問題，相信今年業績會好過舊年，有位小股東話自己28元買咗，到依家都唔沽，但公司舊年就有管理層套現，希望老總可以施壓，咁先可以畀到信心大家喎。