成日出入媒體，認真忙碌！成日飛返內地，自必然又有留意吓內地航空業務嘅發展。香港嚟講，上市嘅航空股又的確唔係太多。
北京首都機場（00694）主要業務同個名一樣，經營位於中國北京嘅國際機場（「北京首都機場」）。內地經濟不斷發展，交通自然愈來愈繁忙。隨着全球化加劇，中國嘅航空交通流量增長非常快。公司受惠於呢個趨勢，航空交通流量穩定增長，截至去年十二月底止年度，飛機起降架次達533,257架次，旅客吞吐量達78,675,058人次，貨郵吞吐量累計達1,640,247噸，規模龐大。公司喺航空業務方面嘅收入，包括：旅客服務費，增長6.6%；機場費，增長6.7%；飛機起降及相關費用收入，增長7.5%。
中國經濟仍然保持迅速增長，民航業喺未來五年，相信會維持住每年13%左右嘅增速；另外，機場建設費返還政策，將延續至二○一五年，對公司而言係個大幫助；首機近年不斷加強同國內外航空公司合作，共同開拓航空市場，促進航空公司增加航點同埋航班頻次，完善北京至全球各主要城市的航空網絡。目前，首機仍然繼續新機場嘅建設，不斷落成嘅機場亦會為公司帶嚟盈利，集團成長嘅速度相信會愈來愈快！
睇番數據，集團一一年收入為65億元人民幣，按年增12.5%，盈利為11.14億元人民幣，增長87%。繼續追蹤、出發！
香港大學電子金融服務榮譽助理教授 徐燦傑