絲絲講場：利物浦波衫凸顯渣打善心
好多市場調查嘅結論都話，企業喺做生意嘅地方搵錢，係有責任改善埋個地方嘅質素，絲絲見到渣打（02888）喺呢方面就好識做。
拍賣籌款防治失明
聽渣打講，全世界有3,900萬失明人士，有八成可避免同醫得番，其中九成喺渣打營運嘅發展中地區。渣打嚟緊今季最後一場利物浦英超主場賽事，利物浦件波衫會由「看得見的希望」標誌，取代渣打標誌，用件波衫籌款。
渣打贊助利物浦咁貴，肯讓出波衫標誌呢個位真係好難能可貴，不過佢哋話，防治失明，例如做白內障手術咁，只需30美元，渣打相信可以發揮影響力。聽聞呢次係第一次有慈善標誌出現喺利物浦件波衫度。
今晚深夜利物浦踢完對車路士之後，利物浦球員會喺波衫上簽名，透過渣打國際市場網絡畀全球球迷買，籌到嘅錢，渣打仲會做同額配對捐款添。絲絲睇到利物浦喺今季英超聯賽榜，至今穩守第9名，有渣打一向配售強勁嘅國際市場網絡幫手，賣佢哋嘅產品，應該可以賣番個好價錢。
余詩韻