上個禮拜內地驚傳基金界一哥王亞偉要離開華夏基金，搞到王亞偉概念股散晒，華夏基金仲畀投資者大舉贖回。尋日王亞偉終於親自解釋點解要走，原來啲散戶乜都唔理，淨係跟實佢買，搞到佢擔心班散戶風險太大，連帶做投資決定都受影響，所以決定唔玩嘞。
王亞偉猛呻，班散客唔知佢點樣揀股，亦唔似佢有對沖機制，一味盲目照跟。呢幾年嚟，佢每次想買嘢，都會諗班散戶係咪又跟呢？佢哋嘅風險又有幾大呢？搞到自己嘅投資決定大受掣肘，直情係「困境」添。
佢又話，已經勸傳媒唔好對基金經理買乜嘢都大肆報道，而佢同其他人討論交流，報道出嚟嘅，完全冇晒拋磚引玉嘅效果，最後一舊磚都唔敢再拋。自己郁吓都畀人當做焦點，如果將自己隔絕，又會冇咗投資觸覺……當然，離開華夏仲包括唔認同公司股權轉讓嘅決定，覺得力不從心。
王亞偉係內地公開募集基金界剩餘無幾嘅元老級基金經理之一，連續幾年勇奪最賺錢基金經理嘅美名。佢話以後可能唔做公募基金，依家淨係想休息，「希望我對市場冇影響喇！」