絲絲講場：股神接班人 百萬獎中尋
股神巴菲特嘅旗艦巴郡，每年一度嘅股東會都係全球焦點，今年更甚，皆因世界大亂，股神嘅一言一行都好有啟示，況且今年仲加埋佢嘅健康變化，同埋繼任人誰屬嘅因素。股神呢次都冇開名，但就現兜兜獎勵兩位基金經理，咁係咪等於佢兩個就係熱門呢？
兩基金經理獲獎勵
已經81歲嘅巴菲特喺巴郡股東大會上，盛讚兩個基金經理表現，仲話佢哋獲得100萬美元嘅薪金。股神好重視Todd Combs同Ted Weschler呢兩個基金經理，最近就額外每人加碼10億美元，令到佢哋嘅投資組合增加至27.5億美元。股神大讚佢哋嘅表現好「完美」，仲開出承諾，話如果佢哋睇啱標普500指數嘅走勢，獲得嘅獎勵會更多。
夥蓋茨「戰」華裔球手
不過份工唔係人人啱做，有份幫股神打理巴郡業務嘅兒子霍華德‧巴菲特就話，啲投資者會發癲咁逼佢哋講一啲唔答得嘅答案，所以好討厭同啲憤怒嘅投資者打交道，只可惜呢個係佢嘅工作一部分。
講番巴郡股東會，好多股東都話好好玩，其實股神自己都話好玩，佢嗰日同佢好朋友──微軟主席蓋茨拍檔，落場打幾板乒乓波，佢嘅對手就犀利喇，就係代表美國出戰倫敦奧運嘅乒乓球華裔選手邢延華。股神原來「貼」運動員都有一手，佢七年前與當年僅九歲嘅邢延華交手後，即時甘拜下風，話佢有潛質成大業。