孖妹S檔案：金融裁俊貼市60載
「先敬羅衣後敬人」，孖妹睇勻金融界嘅上市公司老闆、打工皇帝等成功人士，發現佢哋嘅衣着穿戴均大方得體，特別嗰套「fit到漏油」嘅西裝，簡直表現出三大特點：財富、權力同地位。今期孖妹搵嚟「金融界富豪御用」嘅裁縫店，呢間西裝舖喺四八年成立，見證住港股嘅升升跌跌，而佢哋做衫嘅理念更與投資之道不謀而合。
彩兒：高妹，我哋搵「魚缸」就叻啫，搵西裝舖好似有啲難度喎！
高妹：喺我字典入面係無「難度」兩個字嘅！就好似我炒股票咁，屢敗屢戰，終於咪成功賺到第一桶金囉！而且，你唔記得咗孖妹背後有個「魔鬼教練」咩？
彩兒：係喎！「魔鬼教練」咩嘢都知，簡直好似阿拉丁神燈一樣，咁我哋快啲去問佢喇。
高妹：問咗喇！答案就係有「金融界富豪御用裁縫店」之稱嘅培羅蒙，佢嘅富豪客仔認真巴閉囉！好似有中信泰富前主席榮智健、前財政司長梁錦松、基金教父雷賢達等等，就連已故嘅「船王」包玉剛喺生前都係佢嘅熟客！
彩兒：一套靚西裝係成功男人嘅最好招牌，而買中一隻好股票仲唔係成功散戶嘅戰績？
高妹：揀西裝、揀股票都係門學問，兩者更有異曲同工之妙。你唔信！聽吓獨立分析員陳健豪同埋培羅蒙營業經理柯慶華點講喇！
柯：培羅蒙營業經理柯慶華
陳：獨立分析員陳健豪
度身訂做西裝添面子
高妹：我知道你哋嘅裁縫師都係上海出身，個個至少有三、四十年經驗，一件西裝差唔多係由人手一針一線縫製，加上布料都係英國名牌上乘料子，怪唔得之人哋話你哋嘅西裝出晒名手工精細、製作嚴謹喇。
柯：每行都有身為龍頭嘅帶領者，培羅蒙喺八二年已被美國《財富》雜誌（Fortune）選為世界十大裁縫店之一。如果無歷史、無專業、無好評，呢本雜誌又點會慕名而來要訪問我哋呢？其實，我哋嘅目標好簡單，就係要做好西裝，追求質而唔係追求量，所以呢幾十年來我哋都無加過價，一套西裝連工包料都係萬二蚊起。
陳：以前啱啱入行，錢搵得唔多，我都係去啲服飾連鎖店買西裝，有日老闆話有大客上嚟公司，叫啲同事千祈唔好着某連鎖店嘅西裝見客。呢件小事令我發現，原來一套西裝代表咗公司同埋自己嘅形象，於是後來我啲西裝都改為度身訂造，一來啱身，二來可以因應唔同場合而訂造款式。
彩兒：數吓手指頭，培羅蒙已有六十四年歷史，比喺六九年先面世嘅恒生指數，足足大咗二十一年，仲唔係見證住港股嘅變遷？唔知股市好與壞會唔會影響金融界富豪嘅消費呢？
柯：咁經濟好時，客人買西裝梗「疏爽」啲，通常都係六套起計；市況普通時都會做兩套，但好少話唔見咗人嘅！其實一套靚布料兼靚手工剪裁嘅西裝，會令人着得好醒目，仲可以着十年咁耐！而且用人手做嘅西裝，着上身會好輕、好軟、好舒服；相反用機器做嘅西裝令人衣不稱身。
你哋後生唔知道，以前六、七十年代嘅人會覺得一套西裝就代表咗自己嘅行業同形象，好似已故嘅包玉剛先生每次到外地傾生意，梗會嚟做套新西裝，因為佢覺得呢個係尊重自己及別人嘅表現。
高妹：柯生嘅話，令我諗起其實投資都係講求專業態度。記得以前我成日聽埋啲「路邊消息」，明明都未聽過嗰隻股票冧巴，但人哋話實有錢賺架，咁我就瞓身買貨，卒之咪搞到「衣不稱身」，成袋蟹貨囉！
陳：名牌向來鍾意用明星代言人，其實筆廣告費咪羊毛出在羊身上。揀西裝一定要試身，買貴西裝一定要知道佢貴喺邊度；就好似買股票通常都唔會第一次就賺錢，要知道隻股票點解咁貴或者咁平？當發現唔妥，就要即刻止蝕；正如套西裝明明唔啱身，你都要換個套喇！
做衫投資同樣要心機
柯：係呀，做西裝嘅過程一定唔可以求求其其就算，由揀布料、度身、裁剪、試身、再修改、再車工，可見做一件西裝存在好多細節，所以裁縫師少啲心機都唔得，我諗投資道理都係一樣。
陳：所以做任何投資之前都要做足資料搜集，了解個人可承受嘅風險程度，亦要知道唔同金融產品嘅性質、特點及風險。正如揀股票都係咁，當自己係門外漢嘅時候，就要由研究基本因素開始，經過多方面分析之後，先決定買唔買呢隻股票。
彩兒：嘩！真係估唔到揀西裝同揀股票都有咁多共通點，今次我真係上咗寶貴一課呢。
柯：做投資又好，做生意又好，只要你將佢視為興趣，自然會做到專業，有口碑。唔係我經常想當年，而係舊時啲大老闆真係非常之實幹型，注意儀表之外，亦專注事業，事事親力親為。但係依家啲人去投資，買幾個舖位，買幾層私樓，炒兩下，過幾日又話賺到一筆錢喇，但可惜無咗個努力過程呀！
高妹：柯生，你講得好有道理！所謂一分耕耘一分收穫。想透過投資炒股，一夜變百萬富翁，得嘅！不過第一步係將投資化成一門學問，一門專業囉！大家係咪咁話先？
若有料報畀高妹同彩兒或有嘢問，可電郵money.biz@opg.com.hk
高妹、彩兒