絲絲講場：佳兆業高管「夜總會」搏殺
內地繼續調控樓市，令好多城市樓宇買賣少咗，內地發展商反而更努力去諗點樣促銷樓盤、睇實盤數等。絲絲最近同佳兆業（01638）嘅中層管理人員傾過偈，佢就話，除咗晚晚加班，仲要晚晚去「夜總會」。
大家咪以為佳兆業員工好風流成日去夜總會，又或者被迫去嗰度應酬，其實佢哋係話各個部門嘅阿總都好鍾意夜晚先開會，惟有苦中作樂叫呢啲會做「夜總會」。
夜晚開會 周日加班
除咗「夜總會」，佢哋話仲要日日「白加黑」，個個禮拜「6加1」。所謂「白加黑」係內地依家嘅用語「白天加黑夜」咁解，即係我哋所講做到天昏地暗唔收得工。「6加1」較為容易明白，即係六個工作天再有一日加班。不過佳兆業嘅朋友講，唔係個個咁榮幸可以七日無休，通常都係管理層先至咁做。絲絲惟有祝願內地個樓市好番啲啦。
余絲韻