絲絲講場：彤叔得閒湊孫唔會悶
做嘢做咗近七十年，依家已經86歲嘅新世界發展（00017）創辦人鄭裕彤（彤叔）早排隆重宣布退任主席，佢尋日就以集團榮譽主席嘅身份出席動土禮。彤叔話，退咗休之後日日都過得好開心，依家得閒就去湊吓孫、得閒就去玩吓，只係間唔中先返吓公司睇吓，相當寫意。
無縫交接 唔使憂心
周大福鄭裕彤基金拎出成9,000萬資助科大興建全新教學及研究大樓──鄭裕彤樓，彤叔同埋阿仔鄭家純一齊出席動土儀式，同以前一樣，着西裝襯波鞋，不知幾潮。佢致詞話，一直都好支持教育事業，所以希望可以為同學仔提供優良環境同埋設施咁話。
彤叔尋日雖然把聲聽落好似有啲沙沙哋，但無損佢同絲絲一班後生仔女傾偈嘅閒情。純官已經坐正做主席，彤叔話同阿仔交接過程都好順利，即係依家好流行嗰句「無縫交接」，佢相信純官都會做得好好。
彤叔仲話，「佢都（喺新世界）做咗咁耐，梗係無問題，無咩問題嘅！」。退休生活咁開心，又見到佢啲仔仔孫孫咁乖幫得手，彤叔心情梗係勁靚啦。