有人話：「本地證券行已經係夕陽工業！」所以本地「魚缸」要發圍，就一定要不斷創新、增值，至可以更上一層樓。
好似舊年致富集團就邀請咗中國人民大學風險投資研究中心主任劉曼虹做董事，尋晚佢哋搞酒會，致富董事總經理周松堦再宣布請嚟曾經喺中投擔任高級經理，同中國社會科學院從事博士後研究工作嘅著名經濟學家肇越，擔任致富集團嘅首席經濟師。呢啲咪叫做增值囉，啲客見到你有咁多重磅人物坐鎮，對間行嘅「評級」都高啲o架。
尋晚酒會衣香鬢影，加上有肇越博士喺台上深入分析環球宏觀經濟走勢，聽到台下嘅嘉賓拍晒手掌！場面搞到咁盛大，周老闆自然開心到滿場飛喇！佢就話：「肇越博士喺外國及中國都係非常有名嘅經濟學家，之後致富可望喺北京設立嘅金融經濟研究學院，會由佢擔任院長，做一系列嘅環球經濟宏觀分析工作，到時本地投資者實有更多機會聽到佢嘅專業見解。」