數數手指，恒生銀行（00011）副董事長兼行政總裁梁高美懿仲有個幾月就退休，不過退休後唔代表梁太會好得閒，因為嚟緊佢有一個大Project（計劃）要跟，就係佢細女嘅出閣之喜。
梁太做咗咁耐女大班，有咩大Project未做過，今次做岳母大人，一啲都冇擺款，反而好細心幫個女，完全用晒做女賓卡嘅細心穩健作風。點細心？佢話本來諗住搞個家庭旅遊，但發現好多地方唔去得，因為新娘子要保持最佳狀態，搞美食旅行團驚帶來太多誘惑，陽光與海灘就怕曬黑皮膚，可見梁太幾咁緊張呢個Project，亦深明女兒要靚靚咁出嫁嘅心情。
平時好少見到梁太嘅千金，記者淨係試過見到梁太翹住兩個囡囡嘅手，一齊喺馬場欣賞賽事。
梁太就快退休，好多老友都向佢「獻計」——唔係教佢做唔做官，係同佢分享點樣可以有個完美嘅退休生活，就連滙控（00005）嘅前大班浦偉士都畀咗啲心得梁太。
話說梁太前排喺欖球賽度撞到一班滙控嘅舊同事，例如艾爾敦、霍嘉治、林紀利等，仲有滙控嘅「神級」大班浦偉士添！
梁太話浦偉士向佢教路，如果退休嘅話，起碼要放番三個月假，放鬆一排，先好諗之後嘅去向。梁太都非常「聽話」，就算去唔到家庭旅行，佢都決定去澳洲玩吓，順道參觀吓當地酒莊。
講到退休有咩最唔捨得，梁太話最唔捨得恒生同事，因為大家都好團結，好似一家人咁；當然啦，恒生嘅蛇羹出晒名好味，梁太話已經向同事講定，退咗休之後佢都係恒生私人銀行嘅客戶，有蛇宴活動記得叫佢返嚟。
余詩韻