為咗令富士康（02038）擺脫「血汗工廠」呢個污名，母公司鴻海集團董事長郭台銘絞盡腦汁，除咗不斷加人工同改善員工工作環境外，佢日前終於兌現支票，搞咗個為期七日嘅「情越海峽」台灣遊，免費請咗216個內地員工去玩，每個員工仲可以得到一部iPhone 4同埋5,000蚊人仔做獎勵添。
呢個旅行團已經喺啱啱過去嘅禮拜日出發，由香港坐包機抵達台灣，而且由副總裁盧青松親自到機場接機，仲為員工獻花。佢哋喺台灣嘅行程，除咗啲「例牌嘢」，好似士林夜市、阿里山同101大樓之外，郭總仲會喺101設宴招待啲員工，認真巴閉。聽講，呢班來自內地17省、21個廠區共216個員工，好多係第一次外遊，感覺都十分興奮。
不過，要成為幸運兒都唔容易，首先要喺幾十萬個員工當中，脫穎而出成為「富士康之星」，幾乎只係易過中六合彩少少咋。但係又唔使咁灰嘅，郭總話今次只係個開始，如果搞得好，之後會繼續舉辦。所以各位富士康員工，要畀心機做嘢喇！