唔單止「剩女」要作戰，連一啲望落好得嘅都想快啲上岸，金占士最近聽咗個好唏噓嘅古仔，印證咗心頭太高，最終唔單止上唔到岸，仲愈潛愈深添。
係人都想生活得好啲，但點至叫「好啲」真係人人有一把唔同嘅尺。話說L小姐喺本港投行界不算太有名，但30多歲嘅她已經先後喺美資大行同對沖基金公司出任高層，年薪上千萬港紙，生活頗為愜意。聽到呢度，好多人已經好羨慕L小姐咁有前途。只不過佢可能喺投行中接觸過太多有錢人，佢成日慨嘆，自己點解沒能攀上好姻緣，一次偶然機會L小姐滿以為搵到一位與太子黨有關係嘅內地金主（A君），雙方去到談婚論嫁嘅地步，但最後遇人不淑，更惹上官非。
呢位A君聲稱自己係大陸某位前領導人嘅秘書，受內地政治運動連累下海從商，喺山西經營多家煤礦，仲話會去香港借殼上市，L小姐眼見A君屬商場嘅青年才俊，已決定拴牢呢位煤業大老闆，雙方感情很快打得火熱，A君仲將一項估價十多億元煤礦作為定情信物，送上咁重禮，L小姐自然欣喜若狂。
點知A君財力有限，煤礦資產本身負債甚高，佢送畀L小姐，自己為債務當擔保人，如果將煤礦成功借殼上市，結局肯定完美，最唔好彩嘅係單收購無疾而終，債主臨門，L小姐揸住嘅已經唔係資產，係一身債，最後仲被人告上法庭，L小姐嘅前途會點，依家仲未知，但肯定嘅係，佢已人財兩失。
金占士