內房債高息吸引
3D數碼用咗16萬美元，買咗價值16萬美元嘅碧桂園企業債券，批債券一七年四月到期，可於一四年四月以105.625%被購回，年息率11.25厘；又買咗價值20萬美元雅居樂企業債券，年息雖然只得8.875厘，但作價只係18.75萬美元。
一哥笑住話，香港銀行息低吖嘛，呢啲內房公司債息好高，估佢哋點都唔會執笠啩，所以覺得應該都穩陣，而投行買賣企業債其實好活躍，見有筍價就幫公司買，因為公司有現金喺手，費事放喺銀行，一旦要套現亦只須兩至三個工作天就套到現。
至於連日公布買債，就純粹因為創業板規則好緊，第19.06條就收購債券涉及超出公司資產等市值嘅5至25%就要披露，所以佢覺得都幾煩。