光大國際（00257）尋日舉行周年股東大會，吸引好多人去，大家無非想搞清楚，光國副主席兼執行董事李學明身份。
究竟係咪如消息咁講，「李學明」只係個化名，實質嘅身份係前重慶市委書記薄熙來兄長薄熙永。光國行政總裁陳小平早有心理準備應戰，但話董事會查詢一星期後會交代事件。
陳總一早預備好講辭，「交代」李學明嘅背景，佢係由大股東光大集團喺○三年推薦加入光國。陳總話識咗佢咁多年，覺得佢為人低調，加上唔係公司嘅管理委員會成員，所以唔會參與公司嘅日常管理同運作，亦無持有公司股份，仲盛讚佢一直只為公司發展提供咗好多專業同積極嘅意見。
至於李學明依家有無被扣查，陳總就話股東會舉行前一日至同佢傾過電話，知佢依家身處北京，因為感冒所以唔出席股東會，仲話個人感覺李學明係完全自由。絲絲追問陳總有無同李學明傾到有關化名嘅事，佢話呢啲唔喺佢職責範圍，唔喺佢哋談話內容。咁會唔會勸佢出嚟澄清坊間傳聞，佢話要睇佢個人意願！
其實有部分投資者都親身問光國，希望佢哋澄清傳聞，公司話一視同仁，都係回覆呢啲內容。陳總強調光國並無涉及任何嘅調查，認為大家應該將目光注視喺公司嘅業務發展上。