facebook（fb）早前話買起Instagram，係fb發展過程嘅突破，但原來呢個突破，淨係由fb創辦人朱克伯格用短短三日時間先斬後奏傾成，董事局一直都係蒙在鼓裏！
《華爾街日報》爆料，話朱克伯格好耐之前已經開始對Instagram「起痰」，佢眼見Instagram嘅用戶升得咁快，支援埋Android之後短短幾日，仲加多咗數以百萬計嘅用戶添，覺得fb喺流動程式方面落後畀啲新進科企，就搵咗Instagram創辦人斯特羅姆上嚟佢屋企傾喇。
談判嘅第一日，斯特羅姆開價20億美元，足足係依家埋單價10億美元嘅一倍！朱克伯格好巧妙咁壓價，佢問斯特羅姆覺得fb值幾多，如果認為fb市值有朝一日會好似Google有成2,000億美元或以上嘅話，就應該接受fb現有估值1,000億美元嘅1%，咁樣就達到你所要求嘅價位喇。朱克伯格呢招反傳統評估企業估值嘅方法，最終當然傾掂數喇。
之後嗰兩日，呢兩位廿多歲嘅舵手傾埋啲細節後，朱克伯格先搵埋fb一位企業發展主管執埋啲手尾。第二日，朱克伯格同董事局舉行例會，先「知會」一班董事，「象徵式」舉行咗場投票，通過呢單fb歷來最大宗收購。你可以話辦事效率高，但佢哋其實都可以話係「一人獨大」嘅企業。
余詩韻