飲食業搵嘅都係辛苦錢，舊年經營至為艱巨，實施最低工資、租金升唔停、食品原材料價格隨通脹上升。稻香（00573）係飲食業一員，當然係一齊捱。尋日絲絲咁啱睇到稻香嘅年報，真係要畀個「Like」（讚）佢哋成班董事！點解咁講，因為佢哋舊年喺董事會出席率呢方面攞滿分，執行董事就不在話下，竟然連非執董同獨立非執董都咁勤力，真係好少見。
佢哋舊年嘅年度，一共開四次董事會，十二位董事嘅出席率都係百分之百，就連其他會議，好似薪酬、審核、提名委員會，出席率都幾乎滿分。非執董及獨立非執董嘅出席率至為重要，因為佢哋係代表小股東，監察住公司係咪規規矩矩，稻香嘅非執董咁勤力，小股東都應該畀個「Like」啦！
一直以來，絲絲都覺得佢哋成班管理層都好團結同努力。月初絲絲同公司行政總裁梁耀進食飯，佢話今年會開拓業務至廣東省以外嘅城市，所以都要多啲中港兩邊走，仲話上市五年以來，公司業務增長保持有雙位數，都算對股東有交代咁話。
講開又講，稻香喺○七年六月上市之前，向一班董事同管理層授出一批購股權，行使期係○九年六月至今年六月，睇嚟就快到期，但當中唔少部分仲未行使嘅。絲絲睇番個行使價同現時股價，如果依家行使，然後沽埋，都應該執好多。