內地食品市場「爭崩頭」，再加埋食品安全事故接踵爆發，唔少龍頭品牌都爭相同國際品牌拍檔，瞓身搶攻市場，近日康師傅（00322）除咗同日本薯片大王卡樂B合作之外，絲絲仲收到消息，話管理層未來仲會大力拓展休閒食品市場，希望將國際零食品牌引入內地，目標喺二○二○年，將方便食品嘅收入佔比提升至9%。
有分析員老友最近見過佢哋管理層，收到風話康師傅同卡樂B合作只係頭炮，類似合作陸續有來。絲絲睇番舊年公司方便食品嘅收入佔比只係得2.56%，計一計，即係八年內要提升6.44個百分點。有消息話公司有意進軍下游肉製品業務，好似火腿、腸仔等，之不過依家仲係同日本公司傾緊，未有定案住，但到二○二○年，目標所佔嘅比例只係得1%，低過方便食品好多。
講開又講，據聞康師傅同卡樂B嘅合作會以新品牌推出產品，打消咗絲絲曾經諗過：會唔會有「卡樂B師傅」或者「康樂B」crossover嘅念頭添！