孖妹S檔案：租超貴 魚缸點維皮？

高妹：散戶炒股梗係希望啲佣金愈平愈好，不過低佣金競爭搞到本地中小型證券行無啖好食，好似早前僑豐證券就先後關閉咗旺角、深水埗同鰂魚涌分行。僑豐嗰邊就話，由於公司可能轉型，以服務機構投資者為主，所以先會關閉分行，並唔係因為租金成本上漲。

灣仔分行

紅磡分行

彩兒：不過，我早前去搵屋租，閒閒哋三百呎嘅單位都開價八、九千蚊。我見啲證券行間間都話過千呎，有啲又兩層高，又有「豪裝」，散戶梗係坐得舒服喇。不過近期港股吹淡風居多，證券行都唔知要做幾多單刁，先至可以「維皮」喇！

高妹：所以近期咪有證券行開始cut分行、賣盤、甚至結業囉！不過，有輸家自然有贏家，有啲老闆索性「你有你執，我有我開」！搞到我真係好想知，究竟一間「魚缸」到底值幾多錢？

彩兒：解鈴還須繫鈴人！不如我哋直接去搵幾間本地證券行嘅負責人攞答案喇。

維持門市當做宣傳

沈：訊滙證券行政總裁沈振盈

彩兒：聽講訊滙證券旗下五間分行都係租嘅，依家啲租金咁貴，你哋捱唔捱得住o架？

沈：老實講，證券分行真係一件雞肋，食之無味，棄之可惜！但佢都有正面作用嘅，例如幫公司收吓新客，賣吓宣傳咁。雖然我哋嘅分行唔係自置物業，不過因為每間分行嘅面積唔算太大，所以營運成本好平均，全包宴咁計，最平嗰間都係5萬，最貴嗰間都係6萬至7萬蚊。如果月租要10萬以上，真係無得做o架！

高妹：咁今年仲開唔開新分行呀？

沈：保持現狀喇！不過由於觀塘要重建，所以嗰間分行要搬去同區其他地方，都要再拎一筆裝修費出嚟。要知道，租舖一定有成本壓力，加上依家業內競爭模式係鬥平佣金，去搶客搶市佔率，喺咁嘅形勢之下，證券行好難做得大。而且我哋仲係採取經紀制，由於要拆帳畀經紀，所以佣金水平唔可以壓得太低。嗰啲5蚊一單刁，真係頂爛市，但呢種風氣唔好，所以我哋唔會跟隨。

彩兒：難怪我之前聽到有散戶講，將某間證券行個名改做「5蚊證券行」喇！

分行平均月使20萬

周：致富證券董事總經理周松堦

高妹：致富證券現時有十九間分行，其中十六間係自置物業，睇嚟周生唔使捱貴租喇？

周：為咗方便各個地區嘅潛在客戶去開證券戶口，以及畀舊客做吓實物股票交收等服務，我哋喺○二年至○四年期間不斷擴充分行數目，所以今年暫時唔會再開喇！雖然大部分分行都係自置物業，不過持有者係屬於另一間有限公司，所以租都係要照交，不過就收平啲租金咁解，計埋人工、裝修、租機費用等等，每間分行平均每月都要使20萬！不過做生意梗係以客為先，呢啲錢唔慳得嘅！

彩兒：我知道依家致富嘅股票佣金收費，每單最低收38蚊（交易金額的0.0675%）！假設單單刁都係收38蚊佣金，計一計條數，即係每個月每間證券行差唔多要做5,263單刁先可以cover嗰20萬成本喎！

高妹：我諗我哋兩個夾埋去炒股票，都要炒番三、五、七年，先會炒到呢個數喇。不過，我又想知道除咗自置物業以外嘅證券分行，邊間舖嘅租金係最貴呢？

周：荃灣區嘅分行係地舖連閣樓，月租都要10萬！所以我已經喺呢間舖嘅對面，買咗個舖位，等租約完咗之後，就將分行搬過去對面街。

自置物業唔怕貴租

張：信誠證券聯席董事張智威

高妹：要做到100%自置物業唔難嘅，睇準入貨時機，加上有錢咪得囉！好似信誠證券咁，現時總行連埋分行共有7間，間間都係自己嘅貨，唔使捱貴租。

張：我哋老闆（信誠證券董事總經理劉昇昂）經營證券分行嘅理念係「貴精不貴多」，所以唔會盲目咁追求分行數目。未來我哋會繼續物色合適地點，喺唔同地區都會做資料搜集，好似潛在客戶數量、舖位地段、面積、買賣成本等等。當各種時機及因素都配合到嘅話，都會考慮再買舖開分行。

彩兒：除咗中環總行之外，應該就係尖沙咀分行嘅面積最大，大約有2,000幾呎。其實開證券分行係咪愈大愈好呢？同埋你哋點睇「5蚊證券行」嘅競爭策略呀？

張：其實分行面積唔使太大，亦唔需要密集式咁分布喺唔同地區，因為我哋都會擔心實際使用率嘅問題。其實只要開新舖之前做足資料搜集，以有效嘅營運策略去提高分行質素，相信已經可以滿足到客戶嘅需求。至於面對行家推出超平交易佣金去搶客，信誠就一定唔會加入戰團，始終平佣金係「累鬥累」，我哋深信優質嘅服務質素及交收系統，先係致勝之道。

高妹：競爭永遠都係殘酷嘅！5蚊佣金其實低處未算低，因為恒山證券為咗搶客，實行推出每單刁只收3.8元佣金嘅全城震撼價。咁樣鬥法，我估各位「魚缸」老闆們喺擔心加租壓力之前，都係擔心減佣壓力先喇。

本港部分證券行分行數目

證券行　分行數目（不包括總行）

時富 3

凱基 4

京華山一 5

訊滙 5

信誠 6

輝立 6

英皇 12

海通 12

耀才 13

致富 19

資料來源：各證券行網頁

若有料報畀高妹同彩兒或有嘢問，可電郵money.biz@opg.com.hk

（彩兒） （高妹）