絲絲講場：特步名車金鞋冧partner
內地體育股舊年業績令人唏噓，但特步（01368）份成績表都算吐氣揚眉，主席丁水波亦好識做，日前趁品牌搞十周年慶典，大手豪送寶馬（BMW）汽車同足金波鞋畀一班優秀嘅合作夥伴以示獎勵，唔似其他同行逼代理商「科水」綑綁式買貨咁趕客。
紅星代言 後生仔like
現場所見，特步旗下明星代言人總動員賣力獻唱。佢哋有個包羅晒旗下代言人嘅「特步家族」，代言人始祖謝霆鋒難得現身，加埋潘瑋柏、韓庚同蔡依林，唔怪得特步近年可以俘虜咁多年輕粉絲啦。特步獨家標榜嘅體育、娛樂營銷雙軌並行品牌策略，打破傳統大賣體壇健將嘅宣傳，令時尚消費者大為受落之餘，仲開始令其他同行倣效。
特步話明今年會推出多項宣傳推廣活動，務求催谷銷情兼塑造企業形象，所以今次慶典亦趁勢打響宣傳頭炮，就係一連簽下兩位全新跑步系列產品代言人，包括著名影星桂綸鎂同最新世界室內短跑冠軍加特林（Justin Gatlin），睇嚟特步喺娛樂界嘅挖星行動仲陸續有來，特步家族陣容勢將壯大。