絲絲講場：建行高層領軍去賣旗
賣旗籌款唔係新奇事，但係尋日絲絲路經中環，就真係喺班「賣旗生力軍」度，買咗個驚喜！話說尋日朝早，絲絲搵散銀買旗仔嘅時侯，抬頭一望，估吓見到邊個？原來賣旗人係建行（亞洲）行政總裁兼首席執行官郭珮芳Miranda！
熟客成千蚊買支旗
絲絲買旗一般都係捐兩蚊或者五蚊，但尋日就見到位善長仁翁，捐咗成1,000大元去買一支旗仔！原來呢位係Miranda嘅銀行熟客，所以話阿姐級人馬嘅號召力真係唔講得少，撞多幾個熟客，捐款數字分分鐘直線上升，犀利過歡樂滿東華。
Miranda話呢個係建行為「健康快車」籌款嘅賣旗活動，為咗幫「健康快車眼科火車醫院」籌募經費，一班建行員工，一朝早八點鐘就齊集中環，Miranda仲親自落場，做善事精神爽利嘛。今次已經係建行同健康快車嘅第三次合作，籌得善款已幫到1,000個內地偏遠山區嘅白內障患者畀手術費，希望幫佢哋恢復視力之餘，亦可以幫佢哋脫貧啦。