効力新鴻基地產（00016）35年嘅雷霆，終於入局啦。新地董事局尋日公布呢項喜訊，雷霆由今日開始，就係新地嘅執行董事，呢項任命，係對佢多年貢獻嘅肯定。
57歲嘅雷霆，係中大畢業生，主修工商管理，七七年加入新地，計番年資，分分鐘一畢業就「賣咗身」畀新地，係正宗老臣子。佢依家負責銷售同推廣集團多個大型住宅項目，以及收購同出售集團非核心物業投資項目。
新地每年賣樓金額數以百億元計，近年經由雷霆操刀銷售嘅樓盤，普遍均有價有量，除咗屢次創造高價成交外，唔少樓盤更以極速姿態一Q清枱，為雷霆贏得新地樓神美譽。
雷霆個名發音響亮，但熟悉佢嘅人都知佢好靜，同佢拍過檔嘅人，就話佢為人爽快，推廣同銷售樓盤功力深厚，每次賣樓都會吸引全城經紀傾力參與促銷。佢又好重視、提攜下屬，有時為咗慰勞同事開盤時嘅辛苦，更會「萬歲」，宴請下屬作為鼓勵，唔怪之得啲同事、地產代理咁擁戴佢啦。
佢依家揸住6萬股新地股份，另有可認購8萬股新地股份嘅購股權。喺截至今年六月三十日止之財政年度，雷霆有權收取每年十萬元，作為出任執董之董事袍金及其他預計酬金約1,580萬元。
余詩韻