亞洲新興市場一直係銀行家嘅拓展目標，特別係高端客嘅財富管理業務，如果手握幾個超級富豪客戶，睇怕銀行都唔敢炒你。金占士老友就話，食得鹹魚抵得渴，亞洲富豪比起歐洲嘅富豪更加難服侍，同銀行嘅關係就好似呢個世代好流行嘅即食文化。
點即食法？為求交易快、回報高，佢哋會成日轉財富管理公司，或者將財富分畀幾間唔同嘅公司打理，更加唔會同銀行建立長遠關係。
有大行做過財富管理調查，舊年亞洲百萬富翁人數有330萬，升10%，僅次於北美洲340萬，但係已超過咗歐洲310萬個數。亞洲富豪雖然人數多，但「邊際利潤」就低過歐美富豪。點低法？舉例幫歐美有銀士管100蚊，有兩毫半到三毫子落袋，但幫亞洲有銀士管理就得一毫半到兩毫子落袋。
聽講亞洲富豪以前平均已經每人有3至4個私人銀行家服侍，富豪想短時間有雙位數回報，有私人銀行家話亞洲富豪只係需要一個私人經紀商，唔係私人銀行家，因佢哋想投資搵錢，唔同歐美傳統富豪，首要守業。
金占士