一年一度叫絲絲又眼紅又想睇嘅時間又到，就係長實（00001）、和黃（00013）發表年報，絲絲第一時間揭去打工皇帝和黃大班霍建寧嘅薪酬資料嗰版。和黃3G業務持續有改善，發現佢舊年又獲加薪近一成一，袋咗超過1.7億元！以標準稅率15%同佢計，要交成2,555萬銀稅款，所以佢老細、年年人工5千蚊嘅超人李嘉誠，每次記者會上都笑佢人工高。
睇晒長和嘅年報，兩公司舊年盈利都有增長，所有執行董事都人人有薪加。和黃舊年董事總酬金超過3.82億元，而霍大班一個人就佔咗近四成半！至於小超人李澤鉅，和黃同埋長建（01038）兩份薪酬，升幅都有近一成七，有近6,600萬元，響長實加薪近一成半，袋大約5,800萬元，加埋都有近1.24億元o架。至於其他主要的執董，大致加薪約8%，每人大約四千萬元左右。
而同小超人一樣身兼長實和黃兩邊執董嘅甘慶林，收和黃加長建人工共加超過一成五，收1,753萬元；響長實就加約5%，收約二千萬元，共收約3,777萬元（註：李澤鉅及甘慶林因身兼數公司董事，上述資料未扣除回付總公司金額）。
長實方面，各執董酬金就比較平均，除小超人外，大家都收約二千零萬元，加幅都係約一成。董事總酬金2.02億元，加幅10.67%。
余詩韻