Market Insight：瑞聲科技逆市呈強之謎
意大利、西班牙長債息持續反彈，兩輪LTRO威力在潮退當中，以往炒第四季業績餘溫，四月股市升多跌少，基金搵埋呢個月，故有sell in May go away的順口溜。不過，去年下半年歐債危機水深火熱，業績期無大驚喜，歐美股市近日級級落，或者今年要改改口，sell in April go away！
唔認都唔得，三月下旬開始港股已明顯轉弱，成交愈玩愈縮不在講，仲跌多升少，十五個交易日跌了十一日，淡友猶如地上最強巴塞上身，狂數好友11比4。
假後復市，連日來美國就業數據唔好，中國通脹高於預期，加埋追補歐美股市跌幅，大家有晒心理準備港股要低開，意料之外，反而低位反撲力度極弱，指數低位彈唔到兩百點又腳軟，連內地公布三月份外貿回到輕微順差，A股跌轉升，跌勢亦於事無補。
芬佬仲未全部歸位
古勝相信，一來係唔少芬佬趁市靜仲未放完假歸位，其次，新一份衝着民企而來的渾水報告，講到似層層一至兩星期內曝光，如非膽生毛，難有勇氣博個別超賣二三線股反彈，拉閘上嚟，隨時為粒糖輸間廠。話說回頭，渾水夠吉士事先張揚，畀賓架靜市無聊，玩吓捉鬼，開過Excel計計，儘管不知net short sell有幾多，但至少兩三個月的沽空多寡，整個「輸凸拉」的名單自娛一下無傷大雅。
話時話，港交所（00388）搞延長交易時段，逼到大家消化不良兼悶多個半鐘，倒不如投放資源提升資訊透明度，舉例，今日對沖基金大舉東來，香港連股份累積沽空數字，得幾間主要借貨行操盤部掌握，資訊完全不對等，散戶未玩先輸，完全處於劣勢，試問點會對魚缸產生興趣，刺激成交的目標，只會愈走愈遠。
即使唔係果粉，唔用iPhone同iPad，日常生活仲係天天被蘋果公司新聞包圍，過去一星期內，由媒體篇幅包括蘋果高層走訪富士康（02038）、CEO Tim Cook進身全球打工皇帝去年收取3.78億美元人工。
蘋果概念夠晒煞食
早兩日，坊間繪影繪聲，傳出話蘋果公司已經將iPhone 5及7吋iPad mini的初部原型機種交付代工商試產，4吋Mon、A5X處理器、Liquid Metal外殼，唔單止要大家變晒硬件設計專家，相信此等有意的放料，其中一個目的係提升潛在顧客期待感，等新產品一推出有賓虛咁嘅場面，公關功夫一流。
貴為全球最大市值，最多眼球留意住的巨無霸，當然好多人跟住消息搵食，台灣最多相關零部件及代工商，iPhone5及7吋iPad mini，同現有系統最大分別是屏幕呎碼變大，近兩日高端面板生產商奇美電（TT3481）及友達（TT2409），傳到接到「柯打」一樣，被炒家追捧，港股中，飲到蘋果公司奶水的唔多，昨日瑞聲科技（02018）逆市升兩格，中段更見過52周高位，看來尋寶的果粉芬佬，對於幫iPhone及iPad生產微型喇叭的瑞聲，食指大動。
多間大行睇好業績
去年瑞聲盈利得5%增長，計落22.9倍往績市盈率唔平，不過，買股票睇未來唔係睇過去，管理層見完分析員，發出上半年銷售指引（或者加埋近期蘋果新產品傳聞），大行普遍睇今明兩年業績睇得幾好，16間大行有13間調高今年盈利預測，平均增加3,155萬，去到14.97億元增長44.5%，一二年市盈率回到15.7倍，抵唔抵見仁見智，但蘋果公司美國股價日日創新高，隔晚逆市升至636美元，有分析員目標價唱到1,000美元，音樂椅遊戲幾時完無人知，但個市場可以炒作的故事唔多，短期內瑞聲會係唔錯的安全之選。
古勝