金占士嘅老友話，佢有個中資大客早喺二月初下令「全走」，將所有股票放晒，寧願轉去做定期，怕有事發生，寧願睇定啲，其後果然不斷有消息傳出，內地股市持續離奇尋底，但無諗過呢盆「麻辣火鍋」竟然會潑到咁遠。
大莊清倉 民企爆鑊
直至有隻熱門民企早前突然清倉式暴插，當時大家都以為只係基金季尾大清貨，但金占士就聽到，有個一直幫手炒呢隻股嘅中資大莊，突然響最後半粒鐘將所有貨掛沽，要錢唔要貨，套晒現金之後，就趕去機場。
「麻辣火鍋」會辣到幾遠，依家仲好難估，老友話好多內地資金一直響香港流轉，內地有咩風吹草動，佢哋收風一定比港人快，所以切記唔可以低估內地政治事件嘅影響，同好多大陸資金嘅政治智慧。
金占士