跑馬拉松一定身水身汗，恒生銀行（00011）傳訊及企業責任總監張樹槐（Walter）爆料，話佢試過幾次喊住咁跑，雨水、淚水與汗水撈埋一堆，佢唔係辛苦到喊，係感動到喊至真，呢個反應可能同佢嘅宗教信仰有關。
佢話最近一次跑喜瑪拉雅山，賽事進入第四天遇上滂沱大雨，身邊隆隆嘅雷聲，就好似鼓勵佢繼續跑。佢話呢一刻，覺得神與人係何等接近，呢一刻忍唔住一邊跑，一邊流淚。
另一次喺南非開普敦參加56公里超級馬拉松，開賽前一天仲病緊，但比賽當日竟能完成賽事。記得嗰日跑至近40公里，已經攰到不得了，赫然睇到跑道上橫額文字：「Come to me,all you who are weary and burdened,and I will give you rest.」呢句嚟自《馬太福音》11章28節，意思係：凡勞苦擔重擔的人，可以到我這裏來，我就使你們得安息。只有經歷過嗰段長跑嘅艱辛，才能真正感受到這金句嘅震撼與感動。
喺雅典馬拉松長跑差唔多抵達終點前，市內播放着《Chariots of Fire》一曲，Walter聽後亦感動得流下淚來。呢首音樂係講述跑手Eric Liddell嘅電影《烈火戰車》嘅主題曲，此名亦出自《聖經》：「他們正走着說話、忽有火車（Chariots of Fire）火馬，將二人隔開，以利亞就乘旋風升天去了。」佢感動到喊，可能同佢一路希望能在跑步時離開世界嘅想法有關，正如佢好羨慕「傳播學之父」Wilbur Schramm喺臨終之時，係睇住電視離開世界。
余詩韻