孖妹S檔案：股佬吹水區曝光?!

自從港股二次「加鐘」後，午市縮剩一粒鐘，搞到高妹想帶彩兒出去中環同啲財金界大哥大姐食lunch聯誼吓都無咩機會。之但係，呢幾年高妹跟住班股評人出出入入，對於佢哋嘅「吹水區」地點都略知一二，所以上星期高妹就帶咗彩兒去食勻「吹水區」嘅美食，點知就喺中環四季Blue Bar撞到靈獅控股董事總經理藺常念喇！既然「有緣千里能相會」，我哋梗要摸住酒杯底，八卦一下近期財圈gossip喇！

藺：靈獅控股董事總經理藺常念

定期蒲頭貪「三多」

高妹：藺Sir，估唔到喺Blue Bar撞到你，做咩唔返屋企食晚飯呀，反而喺度飲啤酒？

　藺：每個星期我都落嚟兩次左右，呢度有「三多」，老細多、行家多、同埋靚女多，哈哈！好多人喺度搵生意o架！仲有，你都知依家中午食飯時間得番一個鐘頭，好多上市公司都將啲飯局改為晚市，有時我仲要一晚走兩場添，一餐六點半，一餐八點，差唔多晚晚都有人請我食飯呀。好似等陣又有飯局喇，咁我咪落嚟飲杯嘢先，轉頭咪去食飯囉。

彩兒：咁你平時都係一個人落嚟飲嘢？會唔會約埋你啲老友記架？

　藺：唔怕話你知，我多數約啲靚女嚟嘅！其實金融界有好多人都鍾意喺收市後，去飲番兩杯，好似金融界「三劍俠」都好鍾意去玩！不過林家亨就唔飲酒，佢多數陪肥老闆去歎下午茶。記得以前我喺中環返工時，間唔中收市後都會去「╳╳茶餐廳」陪佢哋食埋一份。

彩兒：我啱啱入行，唔係識得好多人，唔知「三劍俠」即係邊三個呢？（笑）

　藺：咪鄧聲興（AMTD證券業務部總經理）、黃德几（金利豐證券研究部董事）同連敬涵（富昌證券研究部總監）囉！我成日都話自己係「夕陽嘅最後光輝」，所以我好enjoy去飯局架，一啲都唔覺得係開OT（加班）。

高妹：彩兒，你唔好睇藺Sir好似「吹水唔抹嘴」咁呀，其實佢好有料架，仲係香港專業財經分析及評論家協會主席添！

　藺：八十年代初我已經喺非洲尼日利亞做嘢，幾年之後賺咗幾百萬，於是返香港炒樓，點知九二年返內地炒樓撞正宏觀調控，蝕到入肉，好彩嗰時我喺香港仲有樓揸手，所以我成五十歲人先入證券行從頭開始，嗰時我得一萬蚊月薪，不過我人又叻，英文又叻，始終畀我喺金融界「打番條血路」出嚟！

高妹：所以大家話「吹水」幾咁有益身心呀，短短十分鐘，我哋就知道藺Sir嘅大半生喇！

　藺：「吹水」係達成生意嘅重要一環！所以我哋嗰班股評人成日都約出嚟吹水，講吓市況、股票冧巴，交換吓業界情報咁！不過，早前特首選舉，我哋就傾「豬」、「狼」多啲。李君豪（港交所董事）係支持梁振英嘅，所以佢肩負好大責任呀，以後佢要幫本地證券業界發聲，向新一任特首爭取應有權益。

彩兒：你哋想爭取咩權益呀？

　藺：唔好話華資證券行難做呀，你見高盛、大摩、摩通都話難賺錢，就知市況艱難喇。喺九十年代初，內地證券商可以嚟香港做生意，但華資行又唔可以返內地搵客喎，卒之依家香港愈嚟愈多中資行！我哋既要面對中資行嘅威脅，又要防範外資行嘅野心，佢哋成日想重推競價市段趁機搵食，可見華資行真係腹背受敵！

高妹、彩兒

若有料報畀高妹同彩兒或有嘢問，可電郵money.biz@opg.com.hk