Market Insight：民企爆煲 草木皆兵

近期不少人畏高，對第二季美股頗有保留，擔心汽油價格高企影響消費，業績期完結QE3未有着落，股市焦點返回經濟數據上，尚幸聯儲局主席伯南克明顯無打算關上QE3大門，成支強心針放響度，美股反覆試高位機會仍大。

美銀美林話上星期環球股票基金錄得44億美元淨流出，新興市場及已發展國家市場股市，分別走資1.3億及42.7億美元，內地○五年以來首次放棄保八，芬佬對大中華股市熱情大減，中國股票基金錄得1.82億美元淨流出，令年初至今累計淨流入減少至10.55億美元，反而日本股市三月底年結前，一直獲熱錢捧場，獲得2.87億元淨流入。

中資消費股走晒樣

近期港股受A股弱勢拖累，季結前夕加上地產股「白色恐怖」，上周五恒指最多跌超過200點，收市前跌幅收窄到53點，全季計數，升11.5%或者2,121點，較最高峰時期升3,326點，掉卻三分一升幅。

兩間公司在一日之內把全季累積升幅化為烏有，說的是旭光（00067）及犯官非的新地（00016），前者照例通告講唔知股價異動原因，收市後業績盈利有七成二增長，暴瀉兩成八傳聞同場外衍生工具對賭有關，面對呢類暴動股，往往是防不勝防，只能盡量唔好將所有雞蛋放在一個籃內。

超過五百間公司於上星期派成績表，通通睇一趟相信要花好多時間，較令人印象深刻，是被視為基金愛股的中資消費類股份，下半年走樣情況嚴重，內地零售市道唔錯，高估值公司標誌着業績容許誤差空間十分有限，看來一次像樣的估值修正會持續。逆境中，更頻密嘅核數師跳船個案，股市對民企恐懼到草木皆兵的境地，日日有民企事先不動聲色下被洗倉，近期有傳聞話幾個揸重二三線股基金，面臨極大贖回壓力，惡性循環持續的話，短期可能要拉閘清倉。

瑞聲科技隨時得益

蘋果公司總裁Tim Cook突然訪華，仲去富士康（02038）巡視生產基地，原來主要應美國公平勞動協會（FLA）報告，希望改善超時工作以及加班給付等問題，推動一規模改革。上星期，先提過蘋果公司同富士康分別位於產業鏈上下游，賺錢能力卻有天壤之別，話口未完，今次減工時變相加薪的額外成本，最後由邊個「啃」，確係唔使問阿貴！尤其華南近期民工荒嚴重，要大量填補不加班所需勞動力，恐怕預期富士康的復甦，有機會被薪酬成本上升抵銷。

另一單關於富士康的新聞，係鴻海斥資8.1億美元，入股日本Sharp近一成股份，成為單一大股東，分析員估計同蘋果公司準備進軍電視產業市場有關，交易厲害之處，係蘋果不費一兵一卒，精人出口，最後鴻海埋單，坐收漁人之利，唔使管麻煩兼唔賺錢嘅生產供應鏈，又可以間接挑戰對手韓國三星。

蘋果假如透過鴻海買面板公司，落實進軍電視產業，或者有分參與iPhone及iPad微型喇叭的瑞聲科技（02018）會係受惠者之一，上周五公布業績，去年賺10.36億元人民幣，只及預期下限，股價低開補裂口後，重返21元樓上有跌唔落迹象，不妨留意。

官方數據似被修飾

雖然今次業績期已屆尾聲，惟料民企股爆煲潮餘波未了，若然想低吸中資股，建議從國企或紅籌股入市，即使中伏亦有阿爺埋單，最多是打個大折扣，肯守的話終有一日可以翻身，當年粵投（00270）便是好例子。

補充一句，上晝收到智能手機推播通知，話內地三月份製造業PMI為53.1，乃連續第四個月上升，按月上升2.1個百分點，亦較去年十一月的低位49升4.1個百分點。數據如此亮麗，古勝初時還以為是愚人節搞作，誰知翻查官網數據正確無誤，頓時感到官方數據與現實情況有點脫節，同日公布的三月滙豐製造業PMI最終數據僅48.3，更令人心生疑惑！是否官方為數據「整容」以穩人心，反正好醜都不能遮太久，季內自必見到真面目！

古勝