絲絲講場：華創有條成長方程式
華潤創業（00291）近年堅持四大業務方向，邊四大方向？原來有方程式計，尋日佢哋趁發布業績嘅機會，一次過計畀大家睇，「主角」係可愛BB，口述嘅係華創首席財務官兼執行董事黎汝雄。
佢只係用咗一分鐘，就清楚咁介紹晒，皆因條方程式本身寫得好簡易，而且仲大大隻字寫喺個背景板上面，再加上一個肥肥白白又精靈嘅小朋友，雖然人仔細細，學黎汝雄話齋，正好反映公司喺中國市場擁有無限嘅發展空間。
條方程式係咁嘅：超級市場手推車、啤酒、豬頭同埋水，然後乘無限心意，再乘291就等於華創。
企業「仲細」 大把前途
黎汝雄即場拆解呢條方程式，原來就正正係華創嘅四大業務，零售、啤酒、食品及飲品，再加上無限嘅愛心去經營，再乘以公司嘅上市編號就等於華潤精神。喺中國呢個咁大市場中，華創嘅年資只係一個小朋友。雖然小朋友依家年紀好細，但就聰明伶俐兼可愛，有好大嘅發展空間同潛力，唔似得一啲已經好成熟嘅企業咁樣。
黎汝雄仲介紹咗集團董事長宋林提出嘅座右銘頭兩句嚟講出公司精神，就喺「堅持業績不向辛苦妥協、價值觀不向業績妥協」，至於餘下個幾句，佢大賣關子，叫絲絲向灣仔華潤總部望吓！