《巴賽爾資本協定三》嘅實施，搞到外資行收緊貸款，班資回朝，早已係財資市場嘅公開秘密。莫講話部分急於撲水嘅內房企業要轉軚改為發債集資，即使係個別本港巨企嘅再融資銀團，安排行都會建議先以較細規模試水，待取得一定嘅認購反應，才加碼至原定嘅貸款規模。
不過近日一家內地科網巨企籌組中嘅大額美元貸款，就成功吸引大批銀行參與，可謂逆市奇葩。
其中一位有份參與該貸款嘅老友同金占士講，這間內地科網巨企籌組嘅美元銀團規模達到幾十億美元，由於貸款係以不同年期部分組成，部分更係過渡貸款，所以佢原本都以為要再花時間搵承貸行參與。不過銀團嘅第一場路演，反應熱烈實在叫人意外，十幾家受邀參加銀行連埋科網巨企竟然已有九十多人到場，各安排行自己都搞得掂，唔使再將個銀團發大！
老友仲話，呢單貸款嘅息價仲拉鋸緊，初步睇應介乎約為LIBOR加400個點子左右，考慮到依家嘅資金環境同貸款年期，息價並唔算特別高，行家對呢單生意咁有興趣，主要係睇中這家科網巨企嘅龍頭優勢，亦可能同科網巨企系內，其他融資計劃可能陸續有來，搵到好客之餘又能建立長遠關係，正所謂放長線釣大魚嘛。
金占士