牛熊輪流炒：建行炒業績 小注17213
隔晚美股下跌，A股就有社保基金入場的消息而靠穩，港股繼續Chok上chok落，連續兩日即市穿過250日牛熊分界線，最終力保不失，主板成交降至612億元。
港股昨日沽空64.23億元，比率升至10.49%，水平超高，聽過坊間有專家話國壽（02628）實際價值10蚊唔到，筆者唔夠膽睇咁低，但此股肯定是空軍的主力對象，昨日沽空4.08億元，佔沽空6.35%，佔股份成交更高逾四成。
值得注意的是，即月期指轉高水，按前日恒指衍生工具倉位，好倉實際是流入了3,656萬元資金，淡倉就有多至8,022萬元的大額資金流出，坐貨者明顯傾向睇好。
近日港股成交動力不足，國指弱勢，但牛熊街貨量分布顯示，大家對後市缺乏一面倒的睇法，前日恒牛總街貨24億份，熊證就單日減少了3.2億份街貨，令總數降至25億份，兩者相差無幾。
睇番恒指即市高低波幅237點，過去五個交易日於21,454點至20,756點間區間上落，幅度不算大，要在牛熊證市場搵食者，都偏向高槓桿比率，收回水平較貼現價，短炒靈活走位的同時，毋忘風險，因恒指波幅指數推出以來，現時已跌至歷來最低水平，昨收20.86，唔多唔少反映了窩輪的引伸波幅正處低位，買輪的吸引力增加，但要慎防大市遲早爆單邊大上大落。
中資銀行股將陸續公布業績，部分股份的窩輪成交轉活，重農行（03618）業績唔算差，可留意周五出業績的建行（00939），看好的可考慮建行高盛購（17213）今年七月三十日到期，行使價6.88元，實際槓桿約12倍。
Handsome哥