MARKET INSIGHT：康師傅芬佬再買番

葡萄酒交易所Liv-Ex Fine Wine Exchange數據顯示，波爾多高級紅酒價格，比去年六月高位累積跌19.5%；身在股市，股票被分析員唱好，催谷股價是見怪不怪，論到大規模唱好紅酒，真係奇聞。早前酒聖Robert Parker破紀錄，100分大平賣，一次過畀十九款波爾多佳釀滿分，酒災下掀起話題，整個波爾多產區○九年酒價立即反彈，唔少「抹緊汗」，去年由期貨市場入重貨酒商一夜翻生，部分較二線滿分酒，酒價更彈升超過一倍，恍如中六合彩一樣。

內地客推高紅酒價

話說回頭，去年歐遊途經波爾多，見市內店舖，拉菲正莊酒、愛瑪士手袋，都被揮金如土的內地豪客掃清光，感覺猶如處身廣東道，事實上，中國已成為波爾多紅酒最大買家。記得有酒莊老板同古勝開玩笑，話多得中國人，一級酒價至可以去到一兩千歐元歷史高位，五大酒莊賺埋大堆人仔，可以齊齊擴建古堡。

不過，論到豪客收購酒莊，佢就唔多睇好前景，話今日法國企業及老牌家族壟斷下，能夠買到，大部分只啱用來種薯仔，靚田落入外國人手上，可能性仲係微乎其微。

隔晚美股終於抖氣，中段跌幅收窄，多得聯儲局主席伯南克提出退市不能太早，道指由跌過百點，收窄到收市跌68點。有趣的是哈佛大學任教、奧巴馬提名加入美聯儲理事的Jeremy Stein，唱起反調指美國經濟復甦持續，聯儲有機會在二○一四年前加息。

去年十月，伯南克以推出扭曲操作（OT）代替功成身退的QE2，壓低長期利率等美國企業能夠借到平錢，隨着近月美國經濟數據明顯改善，華爾街對經濟復甦的期望亦升溫，兩星期內，十年長債息從1.95厘升至前晚2.37厘，去到四個月高位，聯邦利率期貨顯示今年底息口由目前0至0.25厘，升至0.5厘的機會率，由去年底6.5%升至12.1%，幅度是少，但正反映息口見底回升之預期升溫，伯南克派定心丸，話退市不能太早，相信係想管理通脹重臨，利率回升的預期，至少唔好令市場帶來動盪，為奧巴馬年底爭取連任，平添枝節。

中國旺旺（00151）業績後創新高，令人對康師傅（00322）成績表抱更大有期望，去年賺4.2億美元跌12%，比大行預期4.5億美元差，通街眼鏡碎，主因係第四季業績遠差過預期，賺5,992萬美元按年同按季，分別跌23.8%及54.1%，股價一度跌至22.4元，尋日收市前拗腰倒升0.15元報23.55元，走勢都算意外。

純利可望強勁反彈

即食麵用的麵粉、棕櫚油，飲品生產材料糖及膠樽材料PET粒子，價格高企是拖累業績主因。毛利率連續兩年收窄，由○九年高峰期34.6%，跌至一○年及一一年的28.4%及26.5%，展望今年通脹高峰回落，過往經驗，未來兩年只要保持一成多銷售增長，純利已可強勁反彈，以每年80億美元銷售額，高位收窄8%的毛利率，等於6.4億美元的經營毛利，雖然目前估值唔算平，但芬佬賭復甦概念，唔理已成歷史的第四季差勁數字，或者成交配合底下，短期應有可為，挑戰25.5至26元水平。

另外，內地今年會積極催谷消費，但體育用品股卻「無福消受」，皆因近幾年瘋狂擴充零售網點種下惡果，如今須面對經濟增長放緩以及經營成本上升嘅挑戰，未來一段時間須設法處理高企嘅存貨，以及大幅收縮零售網點止血，板塊估值遠未到谷底。最近中小型股361度（01361）股價已迭創52周低位，相信大型股亦唔撐得幾耐，且耐心等候Crazy Sale出現再諗撈底！

古勝