市場熱線：和電香港吼位上車
港股尋日大部分時間都係上上落落牛皮格，但到A股倒升兼高收，3點鐘過後當大家警覺性最低嘅時候，港股開始插插，收市後美股期指轉升為跌，期指更大低水116點。港股呢排都陰陽怪氣，前排兩間大行合唱明知冇乜增長嘅祖國移動（00941），跟住派成績表後股價大走樣，然後又托住大笨象（00005）同QQ（00700），同特首選戰一樣咁風起雲湧。
恒指全日跌202點，跌穿20日線但仍輕微守住10日線，期指已跌到兩萬一邊緣，成交得559億元。其實尋日早段一眾內需股如霸王（01338）、好孩子（01086）、茂業（00848）等已跌到七彩，同之前亂炒一通已係大轉勢，有可能係博士蛙（01698）事件令民企內需股一鑊熟。
內銀業績主導後市
歐洲經濟脫離危險時期，美國經濟數據又一路轉好，大家已覺鬆一口氣，但隨時好似喺尋日3點咁樣無聲狗咬死人，尤其魚缸已升咗咁多，大戶做落容易過做上。其實港股後市關鍵係內銀股，如果冇內銀接力嘅話，升市亦難成氣候，雖然跟住兩個禮拜內銀股嘅成績表全部都有高分保證，但今年首季新增貸款低過預期，有大行開始唱衰不良貸款會轉壞，所以要（目及）實內銀有乜依郁。
兩隻燃氣股新奧能源（02688）同港華燃氣（01083）可算逆市奇葩，後者派完成績表，一一年PE係18.7倍，呢個估值已拍得住幾隻大燃氣股如新奧、華潤燃氣（01193）、北控（00392）、昆侖能源（00135）等，但佢嘅市值係最細，呢大半個月升幅已有啲誇張。
上周四匯源果汁（01886）一支箭咁飆升，當時甚至有傳聞話可口可樂會重提收購，原來係公司計劃投資葡萄酒，孖屐即刻噓聲四起。三年前匯源話出汽水已劣評如潮，依家進軍紅酒業競爭更大，而且葡萄酒同橙汁大纜都扯唔埋。如果要炒嘅話，傳聞中國食品（00506）進軍白酒業更值得憧憬，話晒阿媽中糧集團夠把炮。
或重演數碼通走勢
祖國電訊股呢排捱打，聯通（00762）創咗接近一年嘅收市新低，兩大本地電訊股則仲算硬淨，前排嘅無限數據plan紛爭已告一段落，數碼通（00315）派完成績表後隨即突破並喺高位整固，另一隻和電香港（00215）則定於今日派全年成績表，近日走勢亦係唔上唔落，有機會學數碼通咁派完成績表後抽上。
不過，古勝認為如果公布業績後有獲利回吐或者跟隨大市回落嘅話，更加係低吸良機，各位不妨可吼位上車，隻股一一年PE預計係16.5倍，數碼通一一/一二年度（六月年結）則係18倍幾，兩隻市值差唔多，數碼通比和電有溢價唔可以話唔合理，但有機會收窄，所以和電業績後上升機會幾高，當然若有低位出現更唔好錯過。