尋日難得大笨象（00005）變小飛象，個市本來升得好哋哋，奈何溫總一句樓市未到價，就令港股倒跌收場。
本來樓市調控力度無得鬆，建築用鋼鐵需求亦受影響，不過早前發盈警嘅鞍鋼（00347）同馬鋼（00323），尋日卻反而逆流而上，分別升4%同2%，令人嘖嘖稱奇。事實上，中央放棄保八，加上美元轉強，令資源價格回軟，而內地鋼鐵行業亦備受高成本低需求嘅環境夾擊，生意難做已經預咗，這從鞍鋼預告去年勁蝕21.5億人民幣可見一斑。
不過從另一角度睇，鐵礦石及煤價向下，卻又有利鋼鐵股提升盈利，這個半杯水問題，就連大行都各有睇法，好似美銀美林就給予馬鋼跑輸大市評級，目標1.7元，但大和反而睇好，認為內地鋼鐵行業已見底，更將馬鋼目標價由1.65元大幅提升至3元。
有智慧不如趁勢，馬鋼上周於2.21元見底後持續回升，已升穿10日及100日線，昨日亦一度升穿20日線，收報2.54元，下一目標睇50日線2.71元，支持位2.4元。