做港交所（00388）主席同非執行董事，除咗係身份象徵外，連酬金都愈嚟愈吸引。港交所下個月二十三日會舉行股東周年大會，將會動議加主席同非執董人工。主席「年薪」會由舊年嘅55萬元，增加63%至90萬元，非執董就由舊年嘅38.5萬元，增加55%至60萬元。
除此之外，港交所亦會動議，向稽核委員會、常務委員會、投資顧問委員會同薪酬委員會嘅主席同成員，每次出席會議有3,000元費用，較去年2,500元增加20%。另就作為各有關委員會嘅主席同成員，分別支付每年12萬元同9萬元酬金，舊年嘅酬金就分別係10萬元同7萬元。絲絲記得，今次已經唔係佢哋第一次加人工，過往已有加人工「前科」。
港交所就解釋，根據顧問公司嘅建議，港交所非執董須投放喺董事會工作嘅時間要比大部分恒指成分股公司為多。此外，現時港交所非執董酬金雖高過全部46家恒指成分股公司嘅中位數，但若相較於2010/11年度，10大恒指成分股公司嘅獨立非執董嘅平均酬金為89.1萬元，則仍有不及；亦遠低於16家海外上市交易所非執董平均酬金嘅116萬元！
余詩韻