呢排市場咁多股隻炒起，要從中挑選股份，真係忙到一頭煙！近排就留意咗隻業務獨特嘅股份金活醫藥集團（01110），此股屬於醫藥行業。
集團嘅分銷網絡都好巴閉，已經覆蓋咗差唔多所有中國地區，只係未去到新疆維吾爾自治區同西藏自治區。依家集團嘅分銷網絡包括成功拉攏咗190間分銷實力強勁嘅分銷商、400間子分銷商、同埋超過17,000家重點管理嘅零售門店；夾夾埋埋有成萬幾間店幫佢賣嘢，當中大部分零售店都會設立「金活健康之家」產品嘅專櫃，用呢種方式推廣集團嘅品牌產品。
金活好強調自己嘅分銷網絡，呢幾年不斷着力喺營銷方面，包括鞏固自身分銷網絡嘅競爭地位。集團呢幾年目標清晰，將中國市場劃分為三個分區，三個分區進一步細分34個地區。集團會親自負責制訂當地嘅行銷推廣活動，同埋爭取與集團嘅客戶緊密合作。
另一方面，公司亦不斷提高自己對行銷團隊嘅要求，引入「精細化管理」模式，確保所有行銷人員可以有個一致嘅目標，按一個統一標準做事。有住呢個優勢，金活會深化自己嘅凝聚力。
集團呢幾年盈利不斷增長，一○年度盈利升19%，截至去年六月嘅半年盈利更升85%，市盈率15倍半左右，息率有2.2厘！繼續追蹤、出發！
香港大學電子金融服務榮譽助理教授 徐燦傑