內地銀行業係咪「暴利者」引發唔少爭拗。深圳發展銀行董事長肖遂寧反駁話，用暴利嚟形容銀行業係對成個行業唔尊重，仲將個視線轉咗去其他企業身上，反問大家點解唔講阿里巴巴主席馬雲係暴利呢？
深圳發展銀行作為內地今年「頭輪」發表舊年成績表嘅銀行，加上淨利潤增長超過六成，自然被拉扯到暴利企業呢個尷尬形容上面。
不過，肖遂寧亦唔係「省油燈」，佢話暴利喺法律同經濟上，係指用唔正當嘅手段嚟獲取超過合理利潤嘅行為，但銀行唔係用唔正常手段去賺取利潤，所以最多只可以話佢哋係高利潤啫。
肖遂寧仲話，銀行業嘅利潤實際上超低，喺內地嘅競爭好激烈，資產收益率只有百分之一，前幾年更只係得百分之零點幾，但其他製造業喺呢方面就有成百分之五咁高。
市場對「暴利」呢個話題引發爭拗，連人行行長周小川都出嚟幫手解畫，話形容得有啲過分，仲話今年銀行業仲要面臨資金唔多夠嘅問題，睇嚟周行長呢番說話都係想為呢個招惹「火頭」嘅話題降降溫。