絲絲講場：周小川無心做世銀行長
人民銀行尋日開記者會，可能一年只得一次，班記者個個使出渾身解數搶咪提問，睇到行長周小川笑笑口。有記者就問，好多人想提名周小川做世界銀行行長，現場隨即響起一片掌聲。周小川話，呢個位一路都係美國人做，呢件事唔使操心嘞！
記者搶咪 人氣熱爆
呢幾年周小川嘅人氣相當高，喺台下嘅記者唔理儀態去搶咪，就知佢有幾受重視啦。可能記者你爭我奪嘅場面太怪趣，令周小川全程都笑笑口。周小川畀多份財經雜誌選佢做「最佳央行行長」，而世銀行長最快六月就要換人，有記者就問，咁多人支持周小川接任，唔知佢自己點諗呢。嘩，呢個問題令到全場拍爛手掌。
周小川好謙虛笑住咁話，《歐洲貨幣》雜誌將年度央行行長頒畀佢，係對中國經濟政策嘅肯定，呢件係好事，但謙稱話唔見得同佢個人因素有乜大關係。「至於世銀行長，一直由美國人做。雖然G20講過，以後行長人選可以調整，但至少目前仲未發生，所以唔使操心呢件事」。