邊個會係港交所（00388）下任主席，近幾個月嚟，都成為市場「估領袖」嘅遊戲，甚至有金融界中人開出「盤口」！
市場中人普遍認為，夠晒資格做港交所主席嘅史美倫（查太），尋日喺北京畀人問到係咪會接夏佳理棒，史美倫拒絕評論，仲話目前政府並冇主動搵過佢傾。
佢仲話，港交所主席個位係由特區政府決定o架，唔係個人可以決定，佢相信政府會有安排。
除咗業界認為史美倫係實至名歸之外，絲絲聽聞，有唔少已經退休嘅，兼且極具江湖地位嘅人，都對呢個位「虎視眈眈」，名字就唔方便透露喇，總之係「粒粒皆巨星」！
咁就梗係喇，金融乃係香港最主要嘅命脈之一，做港交所主席呢個位，「掌管」廿萬億元港股市場總值，真係好有faceo架，而且仲不時會有各國嘅領導人，嚟到港交所嘅交易大堂參觀交流，主席可以同領導人「溝通溝通」，所以個位真係「筍盤」嚟o架！
不過，好多人都覺得，下屆特首係邊個都未知道，對港交所主席嘅人選會有一定嘅影響，所以大家都係擔定「櫈仔」，再等一陣，答案遲啲自有分解。